សាលាសិល្បៈហ្វូណន ពេលនេះបានប្ដូរទីតាំងថ្មីហើយ ដោយក្នុងថ្ងៃបើកឲ្យដំណើរការនៃទីតាំងថ្មីនោះ ស្ថាបនិកនៃសាលាសិល្បៈបុរាណមួយនេះ បានប្រកាសថា នឹងបង្រៀនជំនាញសិល្បៈជាច្រើនទម្រង់ ដោយមិនគិតថ្លៃ ចំនួន៣ខែ។
ទីតាំងថ្មីដែលសាលាសិល្បៈហ្វូណនបើកនោះ គឺស្ថិតនៅលើដំបូលអគារមជ្ឈមណ្ឌលសិល្បៈ និងសិប្បកម្មវត្តភ្នំ ដែលដំបូងឡើយសាលាមួយនេះ ស្ថិតនៅឯសាកលវិទ្យាល័យភូមិន្ទវិចិត្រសិល្បៈហៅ សាលារចនា។ មូលហេតុដែលនាំឲ្យសាលាសិល្បៈហ្វូណន សម្រេចប្ដូរទីតាំងថ្មីនេះ លោកស្រី លីម បុប្ផា ស្ថាបនិកនៃសាលាមួយនេះបញ្ជាក់ឲ្យដឹងថា ក៏ព្រោះតែទីតាំងចាស់នៅឯសាលារចនា គ្មានទីតាំងដើម្បីបន្តសកម្មភាព គួបផ្សំ លោក ជំទាវ ញ៉ែម មរកត ប្រធានមជ្ឈមណ្ឌលសិល្បៈ និងសិប្បកម្មវត្តភ្នំ ឃើញពីការលំបាក ហើយមានចិត្តជួយអភិរក្ស និងលើកស្ទួយដល់សិល្បៈវប្បធម៌ជាតិផងនោះ ទើបលោកជំទាវបានអនុញ្ញាតឲ្យសាស្ត្រាចារ្យនៃសាលាសិល្បៈហ្វូណន នាំសិស្សទាំងអស់មកបង្រៀនលើទីតាំងអគារលោកជំទាវផ្ទាល់តែម្ដង។
នៅពេលដែលទទួលបានទីតាំងថ្មី មានលក្ខណៈធំទូលាយ ហើយជាកន្លែងប្រមូលផ្ដុំភ្ញៀវទេសចរណ៍ជាតិ និងអន្តរជាតិជាច្រើនផងនោះ តាងនាមឲ្យសាលាទាំងមូល លោកស្រី លីម បុប្ផា រួមទាំងលោកគ្រូអ្នកគ្រូគ្រប់រូប បានសម្ដែងការត្រេកអរជាខ្លាំង និងប្ដេជ្ញាថា នឹងខិតខំបង្រៀនដល់សិស្សានុសិស្សឲ្យបានល្អប្រសើរ ដើម្បីផ្ទេរជំនាញសិល្បៈទាំងនោះទៅក្មេងជំនាញក្រោយ។
តាមការលើកឡើងរបស់លោកស្រី លីម បុប្ផា សាលាសិល្បៈហ្វូណន មានបង្រៀនសិល្បៈខ្មែរបុរាណជាច្រើនទម្រង់មាន ភ្លេង ខ្លុយ របាំ និងការស្លៀកពាក់ជាដើម។ សាលាមួយនេះបានដំណើរការតាំងពីឆ្នាំ ២០១០ បង្រៀនដោយសាស្ត្រាចារ្យជំនាញមកពីសាលាវិចិត្រសិល្បតែម្ដង។ បច្ចុប្បន្នមានសិស្សជាង៥០នាក់ហើយ ដោយការបង្រៀនធ្វើឡើងនៅថ្ងៃអាទិត្យ ពីម៉ោង៨ ឮព្រឹក ដល់ ម៉ោង ១១ ព្រឹក ។
ដូចបានរៀបរាប់ខាងលើ សិស្សដែលមានបំណងចង់រៀនជំនាញសិល្បៈដូចរៀបរាប់ខាងលើ មិនថា ខ្មែរ ឬជនបរទេសនោះទេ អាចទាក់ទងមកសាលាសិល្បៈហ្វូណន សាលានៅចាំស្វាគមន៍ជានិច្ច៕ប្រភពមកពីhttp://news.sabay.com.kh/article/1009963#utm_campaign=onpage
0 comments:
Post a Comment